ბენდესი —
წიგნები და მეტი.

წიგნის გამოცემა ჩემთვის
არჩევანით იწყება.

ბენდესი პატარა დამოუკიდებელი გამომცემლობაა — სივრცე ახალი ქართველი მწერლების აღმოსაჩენად და ძველი წიგნების დასაბრუნებლად. აქ მთავარი ლიტერატურული სიღრმე, ტექსტის ხარისხი და გამოცემის ესთეტიკაა.

მე მაკინე ვარ, ბენდესის დამფუძნებელი — პროფესიით ფრანგულის თარჯიმანი, საქმიანობით ფინანსური მენეჯერი და არსით ლიტერატურის მოყვარული. ბენდესის ყოველდღიურ საქმეს თავად ვუძღვები: ავტორთან და ტექსტთან ურთიერთობიდან რედაქტირებამდე, დიზაინამდე, ბეჭდვასა და მკითხველთან შეხვედრამდე.

ჩემი ბავშვობის ოცნება იყო, საკუთარი გამომცემლობა მქონოდა. შემდეგ შევხვდი ადამიანს, რომელიც საოცრად საინტერესოდ წერდა, და ცხოვრებამ მაჩუქა შესაძლებლობა, მისი ხელნაწერების გაცოცხლებით ჩემი ოცნება ამეხდინა — შემექმნა გამომცემლობა. ასე დაიბადა ბენდესი 2017 წელს.

ლოგოზე გამოსახულია ჩემი და ლექსოს შვილი სესილი. მის გვერდით სათამაშო დათვია, რომელიც მამამ იმ წელს აჩუქა, როცა გამომცემლობის შექმნის იდეა გამიჩნდა. ბენდესის სახელიც სესილის მიერ დათუნიასთვის გამოგონილი სიტყვიდან მოდის.

ჩემი მარტოობის უკან უამრავი ადამიანი და გამოწვდილი ხელია. ოცნების ახდენა კეთილი ადამიანების დახმარებით შევძელი — მათი გამოცდილება, მეგობრობა და თანადგომა ბენდესის ყოველი წიგნის ისტორიის ნაწილია. უზომოდ მადლიერი ვარ ღმერთის, რომ ამდენი სიმდიდრის მფლობელი ვარ ჩემს პატარა სამყაროში.

ახლა ბენდესი ახალ ეტაპს იწყებს — იმავე ინტერესით კარგი ლიტერატურისა და მისი მკითხველის მიმართ.